Էթիկա

1. Զբոսավարը իր ծառայությունները մատուցելիս պետք է զերծ մնա պրոպագանդայից, նախապաշարմունքներից և սեփական կարծիքը պարտադրելուց, ներկայացնի միայն հավաստի, փաստագրված, ճշգրիտ տեղեկատվություն հյուրընկալ երկրի մասին (բացառություն են գիտական, պատմական վարկածները, գրական պատումները, լեգենդները կամ այլ ավանդապատումներ)։
2. Զբոսավարը պետք է հետևի շրջակա միջավայրի անվտանգության և պահպանության կանոններին՝ ուղղորդելով նաև զբոսաշրջիկներին։
3. Զբոսավարը պետք է հետևի հատուկ պահպանության տարածքներում գործող նորմերին և կանոններին՝ ուղղորդելով նաև զբոսաշրջիկներին։
4. Զբոսավարը պետք է հարգանք ցուցաբերի այն երկրի նկատմամբ (խորհրդանիշերի, օրենքների, հասարակական և բարոյական նորմերի, ավանդույթների և սովորույթների), որտեղ իրականացնում է իր ծառայությունները։
5. Մինչև ծառայություններ մատուցելը զբոսավարը պետք է տիրապետի զբոսաշրջիկների տվյալ խմբի հետ հաղորդակցման առանձնահատկություններին (պայմանավորված էթնիկ, կրոնական կամ այլ գործոններով)։
6. Զբոսավարը պետք է ցուցաբերի ուշադիր, հարգալից և ոչ խտրական վերաբերմունք զբոսաշրջիկների նկատմամբ։
7. Զբոսավարը պետք է ցուցաբերի կրոնական և քաղաքական զսպվածություն զբոսաշրջիկներին սպասարկելու ընթացքում։
8. Զբոսավարը պետք է զերծ մնա զբոսաշրջիկներին իր մասնավոր, ընտանեկան կամ անձնական կյանքը անհարկի ներկայացնելուց։
9. Զբոսավարը զբոսաշրջիկների ծառայություններ մատուցելու համար պետք է ներկայանա համապատասխան հագուստով, կոկիկ, մաքուր, չչարաշահի զարդերը, նախատեսված լինելու դեպքում պետք է կրի Պատվիրատուի կողմից սահմանված համազգեստը։
10. Զբոսավարը առանց Պատվիրատուի հետ համաձայնեցնելու իրավունք չունի փոխելու զբոսաշրջային ծրագիրը կամ երթուղին նույնիսկ զբոսաշրջիկների պահանջի դեպքում։
11. Զբոսավարը պետք է ժամանակին Պատվիրատուին տեղեկացնի էքսկուրսիայի կամ զբոսաշրջային ծրագրի ընթացքում առաջացած խնդիրների մասին, որոնք կարող են բացասաբար ազդել զբոսաշրջային ծառայությունների որակի վրա կամ վտանգել զբոսաշրջիկների անվտանգությունը։
12. Զբոսավարը զբոսաշրջիկների նկատմամբ այլ անձանց կողմից ոտնձգությունների, իրավունքների խախտման, նրանց իրերի կորստի դեպքում պետք է անհապաղ տեղեկացնի Պատվիրատուին և իրավապահ մարմիններին։
13. Զբոսավարը պետք է զերծ մնա այնպիսի գործողությունների կատարումից, որոնք վնաս են հասցնում Պատվիրատուի պատվին, գործարար համբավին կամ հեղինակությանը։
14. Զբոսավարը չպետք է օգտագործի Պատվիրատուի անունը անձնական կամ այլ նպատակներով՝ առանց վերջինիս հետ համաձայնեցնելու։
15. Զբոսավարը իրավունք չունի Պատվիրատուի զբոսաշրջիկներին վաճառել իրեր կամ ծառայություններ, որոնք ներառված չեն էսկուրսիոն ծրագրի կամ զբոսաշրջային փաթեթի մեջ, կամ պահանջել թեյավճարներ։
16. Զբոսավար պետք է լսի, գրառի և հաշվի առնի զբոսաշրջային երթուղու ընթացքում զբոսաշրջիկների կողմից արված բողոքները, դիտարկումները կամ մեկնաբանությունները։
17. Զբոսավարը պետք է զբոսաշրջիկներին նախազգուշացնի Պատվիրատուի կողմից որդեգրած պատասխանատու տուրիզմի կանոնների մասին։
18. Զբոսավարը պետք է զերծ մնա ծառայություններ մատուցելի օգտագործել ծխախոտ կամ ալկոհոլային խմիչքներ:
19. Զբոսաշրջիկներին սպասարկելիս զբոսավարը պետք է զերծ մնա օգտագործել սլենգ, ժարգոնային արտահայտություններ, վիրավորանք կամ հայհոյանք (բացառությամբ այն դեպքերի, եթե զբոսավարը ստիպված է զբոսաշրջիկների հարցուփորձի շրջանակներում տալ մեկնաբանություններ կամ բացատրությաններ տեղական խոսքի առանձնահատկությունների վերաբերյալ):
20. Զբոսավարը պետք է պահպանի կարգապահություն, ճշտապահություն և բարեխղճություն։
21. Զբոսավարը պետք է ներկայացնի տեղեկատվություն կամ կազմի համառոտ արձանագրություն յուրաքանչյուր էքսկուրսիայի կամ զբոսաշրջային ծրագրի ավարտից հետո։

Սույն կանոնները մշակված են «Բրայթ Տուր» ընկերության կողմից՝ հիմնված զբոսավարների համար միջազգայնորեն ընդունված էթիկայի կանոններին համաձայն: