Բալի կղզու բնական և պատմամշակութային միջավայրը պաշտպանելու նպատակով կառավարիչները զբոսաշրջիկների համար մշակել են նոր կանոններ, դրանցից մասնավորապես․   

• Կիսատաբատով տաճար այցելելն արգելվում է։ Սուրբ վայրերում, հասարակական վայրերում և միջոցառումներին համեստ հագուստը պարտադիր է։
• Մոպեդ վարել կթույլատրվի միայն վարորդական իրավունքի առկայությամբ, սաղավարտով, սթափ վիճակում և առանց «հինգերորդ ուղևորին ծնկներին դրած» (այսինքն՝ չծանրաբեռնված մի քանի ուղևորով)։
• Զբոսաշրջիկները կղզում հանգստանալու համար պետք է օգտվեն միայն լիցենզավորված հյուրանոցներից, գիդերից և վարորդներից։
• Բոլոր վճարումները պետք է կատարվեն միայն ռուփիայով՝ պաշտոնական փոխանակման կետերի միջոցով և QRIS QR կոդով։
• Սուրբ վայրեր այցելելիս պարտադիր է հարգալից վերաբերմունքը և աղոթելու անկեղծ մտադրությունը։
• Արգելվում է աղբ գցել և բարձրանալ սուրբ համարվող ծառերի վրա։
• Մեկանգամյա օգտագործման պլաստիկը ևս կարգելվի։
• Չի թույլատրվի բիզնես վարել առանց վիզայի և շրջել անպատշաճ տեսքով։
• Բոլոր օտարերկրացիները պարտավոր են վճարել զբոսաշրջային հարկ՝ 150,000 ռուփի (մոտ $10)։ Սա վիզայի վճար չէ, այլ առանձին մուտքավճար դեպի Բալի, որը գործում է 2024 թվականի փետրվարից։ Այն կարելի է վճարել առցանց՝ Love Bali կայքի (https://lovebali.baliprov.go.id/) կամ հավելվածի միջոցով։

Զբոսաշրջիկների կողմից այս կանոնները խախտելու դեպքում Բալիի բնակիչները ահազանգելու են պաշտոնական WhatsApp թեժ գծին՝ +62 81-287-590-999։ Բալիի քաղաքացիական ծառայության ոստիկանությունը (Satpol PP) ակտիվորեն կհետևի կանոնների պահպանմանը, իսկ Բալիի ոստիկանությունը կձեռնարկի իրավական գործողություններ լուրջ խախտումների դեպքում։

Բալիի նահանգապետը հայտարարել է, որ «Բալին գեղեցիկ և սրբազան կղզի է, և մենք ակնկալում ենք, որ մեր հյուրերը կհարգեն այն նույն կերպ, ինչպես մենք հարգում ենք նրանց»։

Բալին ինդոնեզական կղզի է, որտեղ բնակչության 83,5%-ը դավանում է Բալիյան Հինդուիզմ, 13,4%-ը՝ իսլամ, 2,5%-ը՝ քրիստոնեություն, իսկ 0,5%-ը՝ բուդդիզմ։ Այն համարվում է աշխարհում հայտնի, պահանջված և հիանալի զբոսաշրջային ուղղություններից մեկը։

Հիշեցնենք, որ ՀՀ քաղաքացիները Բալիի կամ Ինդոնեզիայի վիզա 2023 թվականից կարող են ստանալ այդ երկիր այցելելիս՝ սահմանային անցակետում։ Նույնը վերաբերում է Հայաստան ժամանող Ինդոնեզիայի քաղաքացիներին։ Սահմանին վիզա ստանալու վճարը կազմում է 500,000 ինդոնեզական ռուփիա (մոտ 30 ԱՄՆ դոլար), որով քաղաքացիները կարող են մուտք գործել երկիր 30 օրով՝ մեկ անգամ ևս 30 օրով երկարաձգելու հնարավորությամբ։ Սահմանին վիզա ստանալու ընթացքում անհրաժեշտ է տրամադրել հետադարձի կամ այլ երկիր ճամփորդելու տոմս, իսկ անձնագրի վավերականությունը պետք է լինի առնվազն 6 ամիս՝ մինչև Ինդոնեզիայում գտնվելու նախատեսված ժամկետի ավարտը։